Politikani serb dhe ish kryetari i Kuvendit të Vojvodinës viziton varrezat e Mejës

18:50 | 2 Korrik 2021
L G

Politikani serb dhe ish kryetari i Kuvendit të Vojvodinës, Nenad Çanak, ka vizituar varrezat në Mejë të Gjakovës.

“Të gjitha nënat në botë qajnë për fëmijët e tyre në gjuhën e njëjtë”, ka shkruar ai, në Twitter.

Lajmin për vizitën e Çanakut në varrezat e civilëve shqiptarë të ekzekutuar në Meje dhe Korenicë, e ka bërë publik edhe Lidhja Socialdemokrate e Vojvodinës, kryetar i së cilës është Çanak.

Në njoftimin e kësaj partie thuhet se në fshatrat Meje dhe Korenicë, më 27 dhe 28 prill 1999 janë ekzekutuar së paku 377 civilë, në mesin e tyre edhe një vajzë shtatëvjeçare.

“Çanak vendosu lule mbi varrin e saj [vajzës shtatëvjeçare]”, thuhet në njoftim.

Çanak, që ka qenë edhe deputet në parlamentin shtetëror në Beograd, është njëri nga politikanët e rrallë në Serbi që viziton një vend me viktima shqiptare të luftës, të vrarë nga regjimi i Slobodan Milosheviqit, në vitet 1998 dhe 1999.

Masakra e Mejës është më masivja, më tragjikja dhe më e dhimbshmja në Kosovë. Më tepër se 370 burra e djem janë vrarë në këtë fshat të Gjakovës, më 27 prill 1999.

Postimi i Çanak ka nxitur reagime jo të pakta te serbët. Disa e kanë mbështetur, e ndonjë tjetër e ka kritikuar.

Çanak, që njihet si njëri nga politikanët e parë serbë që ka kundërshtuar regjimin dhe politikat e Slobodan Milosheviqit, të paktën sipas disa fotografive dhe cicërima në Twitter, ka qëndruar në Kosovë, ditëve të fundit. /Telegrafi/

Shpërndaje në rrjete sociale

Lajmet më të lexuara

Të ngjashme

Foto lajm